Act 3 | NdeIBE | STEP | Ngelinye ilanga uPhethro loJohane babesiya ethempelini ngesikhathi sokukhuleka

Acts 3

UPhethro Usilisa Isiceli Esigogekileyo

1 Ngelinye ilanga uPhethro loJohane babesiya ethempelini ngesikhathi sokukhuleka – ngehora lesithathu emini. 2 Indoda eyayigogekile kwasekuzalweni kwayo yayithwalwa isiwe esangweni lethempeli elalibizwa ngokuthi iSango Elihle, lapho yayibekwa khona izinsuku zonke ukuthi icele kulabo ababengena emagumeni ethempeli.

3 Yathi ibona uPhethro loJohane bengena yabacela imali. 4 UPhethro wayijolozela, wenza njalo loJohane. UPhethro wasesithi, “Sikhangele!” 5 Yikho indoda yabakhangela, ithembe ukuthi izazuza ulutho kubo.

6 UPhethro wasesithi, “Isiliva kumbe igolide kangilakho, kodwa engilakho ngikunika khona. Ebizweni likaJesu Khristu waseNazaretha, sukuma uhambe.” 7 Wambamba ngesandla sokudla wamsukumisa, kwathi masinyane izinyawo lezinqagala zaqina. 8 Wathi lothu ngezinyawo zakhe wahle wahamba.

9 Wasehamba labo ethempelini, ezihambela, eseqa njalo edumisa uNkulunkulu,

10 bamnanzelela ukuthi nguye lowo owayehlala ecela esangweni lethempeli elalithiwa iSango Elihle, bamangala baphela amandla ngalokho okwakwenzakele kuye.

UPhethro Ukhuluma Lababukeleyo

11 Isiceli silokhu sithe sece kuboPhethro loJohane, bonke abantu bamangala beza kubo begijima endaweni eyayithiwa liKhulusi likaSolomoni.

12 UPhethro wathi ekubona lokhu wathi kubo: “Bantu bako-Israyeli, lokhu kulimangaliselani na? Kungani lisijolozela kungathi ngawethu amandla loba ngokholo lwethu simenzile umuntu lo wahamba? 13 UNkulunkulu ka-Abhrahama, lo-Isaka loJakhobe, uNkulunkulu wabokhokho bethu useyikhazimulisile inceku yakhe uJesu. Lamnikela ukuba abulawe, lamphika phambi kukaPhilathu, loba yena wayesemise ukumyekela ahambe.

14 Lamphika Ongcwele njalo Ongolungileyo, lacela ukuthi likhululelwe umbulali. 15 Lambulala umsunguli wokuphila, kodwa uNkulunkulu wamvusa kwabafileyo. Singofakazi bakho lokhu.

16 Ngokukholwa ebizweni likaJesu, indoda le eliyibonayo, eliyaziyo yenziwe yaqina. Lilibizo likaJesu lokukholwa okuza ngaye okulethe lokhu kusila okupheleleyo kuyo njengoba lonke libona.

17 “Manje-ke bazalwane, ngiyazi ukuthi lakwenza ngokungazi, njengoba labakhokheli benu labo babengazi. 18 Kodwa yiyo indlela uNkulunkulu agcwalisa ngayo lokho ayekutshilo ngaphambili ngabo bonke abaphrofethi, esithi uKhristu wakhe wayezahlupheka.

19 Yikho, phendukani, libuyele kuNkulunkulu, ukuze izono zenu zesulwe, ukuze kufike izikhathi zokuhlambulula okuvela eNkosini,

20 njalo ukuthi ithumele uKhristu omiselwe linayena uJesu. 21 Umele ahlale ezulwini kuze kufike isikhathi lapho uNkulunkulu azaqondisa konke ngaso, njengokuthembisa kwakhe kudala ngabaphrofethi bakhe abangcwele. 22 Ngoba uMosi wathi, “INkosi uNkulunkulu wenu uzalivusela umphrofethi onjengami phakathi kwabantu bakini; libokulalela konke alitshela khona. 23 Loba ngubani ongayikumlalela alahlwe ngokupheleleyo ngabantu bakibo.’

24 “Ngempela, bonke abaphrofethi kusukela kuSamuyeli kusiya phambili, bonke ngobunengi babo asebakhulumayo, babonisa ngazona lezi izinsuku. 25 Lina liyizindlalifa zabo abaphrofethi njalo kanye lesivumelwano uNkulunkulu asenza labokhokho benu. Wathi ku-Abhrahama, ‘Bonke abantu bomhlaba bazabusiswa ngesizukulwane sakho.’ 26 Kuthe uNkulunkulu eseyimisile inceku yakhe, wayithumela kuqala kini ukuba ilibusise ngokuphendula omunye lomunye wenu ezindleleni zenu zobubi.”